मुंबई :बॉलिवूड अभिनेत्री अनन्या पांडे ही सोशल मीडियावर चांगलीच सक्रिय असते. तिचे बोल्ड लूक चांगलेच व्हायरल होतात. याबरोबरच आपल्या चित्रपटांच्या बाबतीत अपडेट देण्यातही अनन्या तत्पर असते. नुकतीच अनन्या ‘लायगर’ या चित्रपटात झळकली. साऊथ सुपरस्टार विजय देवरकोंडाने या चित्रपटातून हिंदीत पदार्पण केलं. यामध्ये अनन्या आणि विजय दोघेही मुख्य भूमिकेत होते.
चित्रपटातील कलाकारांनी ‘बॉयकॉट’ मुद्द्यावर भाष्य केल्याने या चित्रपटाला त्याचा चांगलाच फटका बसला. केवळ महाराष्ट्रातच नाही तर दक्षिणेतसुद्धा हा चित्रपट सुपरफ्लॉप ठरला. प्रेक्षकांनी याची प्रचंड खिल्ली उडवली. यातील अनन्याच्या पात्राबद्दल तर खूप काही बोललं लिहिलं गेलं. अनन्याला अभिनयावरुन ट्रोल केलं जातं पण ‘लायगर’ने त्या ट्रोलिंगमध्ये आणखीन भर घातली.
या चित्रपटाच्या अपयशानंतर अनन्याने आयुष्मान खुरानाबरोबरच्या ‘ड्रीम गर्ल’ चित्रपटाचं चित्रीकरण सुरू केलं. आता अनन्याने सोशल मिडियायवर पोस्ट करत आणखी एका चित्रपटाचं चित्रीकरण पूर्ण झाल्याचं स्पष्ट केलं आहे. झोया अख्तर आणि रीमा कागती लिखित ‘खो गये हम कहाँ’ या चित्रपटाचं चित्रीकरण पूर्ण झाल्याचं अनन्याने पोस्ट करत सांगितलं आहे. सोशल मीडियावर अनन्याने भावूक होऊन पोस्ट करत चित्रपटातील सगळ्या कलाकारांना शुभेच्छा दिल्या आहेत.