सातारा: साताऱ्यातील किल्ले प्रतापगडावर असलेल्या अफझलखानाच्या कबरीजवळील अनधिकृत बांधकाम हटवण्यास सकाळपासून सुरूवात झाली आहे. या कबरीवरून काँग्रेस प्रवक्ते राजू वाघमारे यांनी भाजपावर सडकून टीका केली आहे. “अफझलखानाला हिरो बनवण्याचा प्रयत्न भाजपा आणि त्यांचे सहकारी पक्ष करत असतात. त्यातलाच हा एक प्रकार आहे” असं वाघमारे यांनी म्हटलं आहे. “अफझलखानाचं नाव घेत धर्मांमध्ये तेढ निर्माण करण्याचा हा प्रयत्न आहे. लोकांचं लक्ष मुलभूत समस्यांपासून भरकटवण्यासाठी या कुरापती करण्यात येत आहेत”, असा आरोप वाघमारे यांनी केला आहे.
“अनधिकृत बांधकामं पाडायलाचं हवीत, पण धर्माच्या नावावर हा प्रकार सुरू असेल, तर हा खेळ त्यांनी थांबवावा”, असं आवाहन वाघमारे यांनी केलं आहे. निवडणुका जवळ आल्यानं धर्मांमध्ये द्वेष पसरवण्याचं काम शिंदे-फडणवीस सरकार करत असल्याचा आरोपही त्यांनी केला आहे.महाबळेश्वर तालुक्यातील किल्ले प्रतापगडावर पहाटेपासून अफजलखानाच्या कबरीजवळील अनधिकृत बांधकाम हटवण्यात येत आहे. यासाठी सातारा, पुणे, सोलापूर, कोल्हापूर, सांगली ग्रामीण या चार जिल्ह्यातील १८०० हून अधिक पोलीस प्रतापगडावर तैनात करण्यात आले आहेत. प्रतापगड, महाबळेश्वर, वाई, कराड, साताऱ्यामध्येही पोलिसांना मोठा बंदोबस्त आहे. या परिसरात जमावबंदीचे १४४ कलम लागू करण्यात आले आहे.
अफजलखानाच्या कबरी शेजारी उदात्तीकरण करण्यासाठी वनविभागाच्या हद्दीत अनेक खोल्यांचे अनधिकृत बांधकाम करण्यात आले आहे. ते पाडून टाकण्याची मागणी हिंदुत्ववादी संघटनांनी केली होती. न्यायालयानेही हे बांधकाम पाडण्याचे आदेश दिले होते. त्यानुसार साताऱ्याचे जिल्हाधिकारी रुचेश जयवंशी, पोलीस अधीक्षक समीर शेख, वाईचे प्रांताधिकारी राजेंद्र जाधव यांच्या देखरेखीत हे पाडकाम करण्यात येत आहे.