गुजरात: गुजरातच्या मोरबी शहरात मच्छू नदीवरील केबल पूल कोसळून 135 जणांना आपला जीव गमवावा लागलाय. याप्रकरणी कठोर कारवाई करत राज्य सरकारनं पालिका अधिकारी संदीपसिंग जाला यांना निलंबित केलंय.यापूर्वी गुरुवारी पोलिसांनी त्यांची चार तास चौकशी केली होती. पुलाच्या दुरुस्तीच्या कामासाठी गुजरातमधील ओरेवा या घड्याळ बनवणाऱ्या कंपनीसोबत झालेल्या कराराबद्दल त्यांना प्रश्न विचारण्यात आला. पुलाच्या दुरुस्तीचं काम ज्या कंत्राटदाराकडं सोपविण्यात आलं होतं, तो अशा कामासाठी पात्र नसल्याचं न्यायालयात सादर करण्यात आलेल्या कागदपत्रांवरून स्पष्ट झालं आहे.
उपकंत्राटदारानं केबल्स फक्त पेंट आणि पॉलिश केल्या. गंजलेल्या साखळ्या बदलल्या नाहीत, त्यामुळं हा अपघात झाला. ओरेवा कंपनी या कामासाठी पूर्णपणे अयोग्य होती. यापूर्वी 2007 मध्येही दुरुस्तीचं कंत्राट कंपनीला देण्यात आलं होतं. गुजरातमधील मोरबी पूल दुर्घटनेच्या तपासावर काँग्रेसचे अध्यक्ष मल्लिकार्जुन खर्गे यांनी प्रश्न उपस्थित केले आहेत. रविवारी पूल कोसळून 135 जणांचा मृत्यू झाला होता.