नवी दिल्ली: नवी दिल्लीत माहिती देताना अमेरिकन दूतावासाच्या वरिष्ठ अधिकाऱ्यांनी सांगितले की, पुढील वर्षा पर्यंत भारताने अमेरिकेचा व्हिसा मिळवण्यात चीनला मागे टाकण्याची अपेक्षा आहे. 2023 पर्यंत अमेरिकेचा व्हिसा मिळवण्यात भारत चीनला मागे टाकेल आणि व्हिसा जारी करण्यात मेक्सिकोनंतर भारत दुसऱ्या क्रमांकावर असेल. अमेरिकन दूतावासातील वरिष्ठ अधिकाऱ्यांनी ही माहिती दिली.
परराष्ट्र मंत्री एस जयशंकर यांनी सप्टेंबर महिन्यात अमेरिकेचे परराष्ट्र सचिव अँटनी ब्लिंकन यांच्याकडे व्हिसा विलंबाचा मुद्दा उपस्थित केला होता. त्यानंतर त्यांनी यावर लवकरात लवकर निर्णय घेऊन काम सुरु करू असे आश्वासन दिले होते. भारतातील यूएस दूतावासाने ट्विट केले आहे की, रोजगार-आधारित व्हिसाची मागणी लक्षात घेता, भारतातील यूएस मिशनने H&L कामगार आणि त्यांच्या कुटुंबांसाठी एक लाखाहून अधिक नियुक्त्या जारी केल्या आहेत.
कोरोनामध्ये व्हिसा अर्ज प्रक्रिया थांबवण्यात आली होती
कोरोना साथीच्या आजारामुळे अमेरिकेने मार्च 2020 मध्ये जगभरातील जवळजवळ सर्व व्हिसा अर्जांची प्रक्रिया थांबवली आहे. पण आता यूएस व्हिसा सेवा प्रलंबित अर्ज निकाली काढण्याचा प्रयत्न करत आहेत. यापूर्वी अमेरिकन दूतावासानेही कर्मचाऱ्यांच्या कमतरतेबाबत सांगितले होते.