निवडणूक जिंकण्यासाठी अमित शहांचा 'मास्टर स्ट्रोक'; 'या' बड्या नेत्याच्या घरी बोलवली महत्वाची बैठक

बेंगळुरू: कर्नाटक विधानसभा निवडणूक तोंडावर आली असून, त्या पार्श्वभूमीवर भाजपचे वरिष्ठ नेते सातत्यानं राज्याच्या दौऱ्यावर येत आहेत.याच क्रमानं गृहमंत्री अमित शाह  आज (शुक्रवार) माजी मुख्यमंत्री बीएस येडियुरप्पा  यांच्या बेंगळुरू येथील निवासस्थानी पोहोचले. यावेळी त्यांचं येडियुरप्पा आणि त्यांचा मुलगा विजयेंद्र यांनी स्वागत केलं.

शाहांनी घेतला निवडणुकीचा आढावा

मीडिया रिपोर्ट्सनुसार, आगामी विधानसभा निवडणुकीच्या पार्श्वभूमीवर येडियुरप्पा यांच्या घरी भाजप नेत्यांची बैठक बोलावण्यात आली होती. सकाळच्या नाश्त्यासोबतच अमित शाहही या बैठकीत सहभागी झाले होते. त्यांनी राज्यातील ताज्या राजकीय घडामोडींवर चर्चा केली. यासोबतच मे महिन्यात होणाऱ्या विधानसभा निवडणुकीच्या तयारीचाही आढावा घेतला.

भाजप नेत्यांची अमित शाहांशी चर्चा

या बैठकीत मुख्यमंत्री बसवराज बोम्मई हेही सहभागी झाले होते. यावेळी भाजपचे सरचिटणीस अरुण सिंह, खासदार नलिन कुमार कटील, कॅबिनेट मंत्री गोविंद करजोला आणि येडियुरप्पा यांचे पुत्र विजयेंद्र यांनी अमित शाह यांच्याशी चर्चा केली.

येडियुरप्पांची राजकारणातून निवृत्तीची घोषणा

फेब्रुवारीमध्ये बीएस येडियुरप्पा यांनी राजकारणातून निवृत्तीची घोषणा केली होती. विधानसभेतील शेवटच्या भाषणात ते म्हणाले, मी सक्रिय राजकारणातून संन्यास घेण्याचा निर्णय घेतलाय. परंतु, माझ्या पक्षाला विजयी करण्यासाठी शेवटच्या श्वासापर्यंत काम करेन. भाजपला पुन्हा विजय मिळवून देणं हेच आपलं एकमेव ध्येय असून यावेळीही भाजपचाच विजय होईल, अशी खात्रीही त्यांनी दिलीये.