मुंबई आंतरराष्ट्रीय विमानतळावर एका संशयित प्रवाशाला डीआरआय अधिकाऱ्यांनी अडवल्यानंतर हे प्रकरण समोर आलं. संशयित प्रवाशाकडून सोन्याच्या पेस्ट स्वरूपात ३.३ किलो सोनं जप्त करण्यात आलं.
संशयिताची चौकशी करण्यता आल्यानंतर अधिकाऱ्यांनी तस्करीत सामिल असणाऱ्या सर्व लोकांची व्यवस्था सांभाळणाऱ्या, सोनं जमा करणाऱ्या आणि या सोन्याच्या तस्करीसाठी वित्तपुरवठा करणाऱ्या या तस्करीच्या साखळीतील अनेकांना ताब्यात घेतलं आहे.
मिळालेल्या माहितीनुसार, भारतात सोन्याची तस्करी करण्यासाठी जवळपास २० प्रवासी दररोज बँकॉक ते दुबई प्रवास करत होते. या प्रवाशांना मागील दोन वर्षांपासून दररोज आळी-पाळीने दुबई-बँकॉकला पाठवण्यात येत होतं. त्यानंतर भारतात आल्यानंतर मुंबई विमानतळावरील कर्मचारी त्यांना पुढील कामासाठी मदत करत होते.
विमानतळावरील कर्मचाऱ्यांना या तस्करीत सामील करत, या नवीन पद्धतीचा वापर करून दररोज मोठ्या प्रमाणात सोन्याच्या तस्करीत अनेक लोक सामिल असल्याचं डीआरआयच्या अधिकाऱ्यांनी सांगितलं. या प्रकरणात आतापर्यंत ११ लोकांना ताब्यात घेण्यात आलं असून भारतात सोन्याच्या अशा बेकायदेशीर तस्करीचा पर्दाफाश करण्यासाठी पुढील तपास सुरू आहे.