मुंबई : बऱ्याच घरांमध्ये रात्री जेवल्यानंतर गूळ खाण्याची प्रथा आहे. पूर्वपरंपरागत ही चालत आलेली प्रथा आहे मात्र त्यामागे खास कारण आहे. तुमच्या शरीरासाठी गूळ नैसर्गिक गोडव्यासह प्रोटीन, विटामिन, बी१२, बी६, फॉलेट, कॅल्शियम, लोह, फॉस्फरस, सेलिनियम इत्यादी पोषक तत्वांनी उपयुक्त ठरतो.
याशिवाय गुळामध्ये वजन कमी करण्यासाठी योग्य पोषक तत्वदेखील असतात. रात्री गूळ खाण्याने शरीराला अनेक फायदे मिळतात. याबाबत आम्ही अधिक माहिती घेतली आयुर्वेदिक डॉ. माधव भागवत, ठाणे यांच्याकडून. गूळ रात्री खाल्ल्यास त्याचा शरीराला अधिक फायदा मिळतो असं डॉक्टरांनी सांगितले.
प्रतिकारशक्ती वाढविण्यासाठी
रात्री झोपण्यापूर्वी गुळाचे सेवन केल्याने प्रतिकारशक्ती वाढण्यास मदत मिळते. गुळामध्ये अधिक प्रमाणात अँटीऑक्सिडंट आणि जिंक अथवा सेलेनियमसारख्या खनिजे सापडतात. फ्री रॅडिकल थांबवून इम्युनिटी बुस्ट करण्यास मदत करते.
अ‍ॅनिमियापासून सुटका
अ‍ॅनिमिया म्हणजे शरीरात लोहाची कमतरता. अ‍ॅनिमियाची समस्या असल्यानंतर व्यक्तीच्या शरीरातील लाल पेशी कमी होतात, त्यामुळे थकवा आणि त्रास जाणवतो. गुळाचे नियमित आणि प्रमाणात रोज रात्री सेवन केल्याने या त्रासापासून सुटका मिळते. गुळामध्ये असणारे लोहाचे प्रमाण हे अ‍ॅनिमियाची कमतरता पूर्ण करते.
वजन कमी करण्यासाठी उपयुक्त
गुळामध्ये असणारे पोटॅशियम इलेक्ट्रोलेट संतुलित करून मेटाबॉलिजम वाढविण्यास मदत करते. तसंच Water Retention ची समस्या कमी करून वजन कमी करण्यास आणि वजनावर नियंत्रण आणण्यास गुळाची मदत होते.
अनिद्रेचा नाश
ज्या व्यक्तींना अनिद्रेची समस्या आहे त्यांनी रोज रात्री झोपण्यापूर्वी दुधात गूळ मिक्स करून दुधाचे सेवन करावे. यामुळे सकाळी उठल्यानंतर चांगली उर्जा राहाते आणि अनिद्रेची समस्याही राहात नाही.
रक्तदाब येते नियंत्रणात
गुळाचे सेवन करून रक्तदाब नियंत्रणात आणता येतो. यातील लोह आणि ब्लड प्रेशर नियंत्रणात आणण्यास मदत करते. याशिवाय गुळामध्ये असणारे पोटॅशियम आणि सोडियमदेखील रक्तदाब नियंत्रित करण्यास फायदेशीर ठरते.