भारतीय क्रिकेट संघाचा सर्वात यशस्वी कर्णधार महेंद्रसिंग धोनी शुक्रवारी (७ जुलै) ४२ वा वाढदिवस साजरा करत आहे. ७ जुलै १९८१ रोजी रांची येथे जन्मलेल्या एमएस धोनीने क्रिकेट विश्वात पाऊल ठेवताच भारतीय संघाचा चेहरामोहरा बदलून टाकला आणि आयसीसीसह प्रत्येक स्पर्धेची ट्रॉफी आपल्या नावावर केली. धोनी हा जगातील एकमेव कर्णधार आहे, ज्याने आपल्या संघासाठी तीनही मोठ्या आयसीसी ट्रॉफी जिंकल्या आहेत. यामध्ये चॅम्पियन्स ट्रॉफी, विश्वचषक आणि टी-२० विश्वचषक यांचा समावेश आहे.
महेंद्रसिंग धोनी १५ ऑगस्ट २०२० रोजी आंतरराष्ट्रीय क्रिकेटमधून निवृत्त झाला, तरीही तो अजूनही आयपीएलमध्ये त्याच्या संघ चेन्नई सुपर किंग्जचा कर्णधार आहे. धोनीबद्दल अनेक रंजक गोष्टी आहेत ज्यामुळे तो महान बनतो. चाहते त्याची प्रत्येक गोष्ट जाणून घेण्यासाठी नेहमीच उत्सुक असतात. यापैकी कॅप्टन कूलच्या १० खास गोष्टी जाणून घेऊयात.
कॅप्टन कूलच्या १० खास गोष्टी –
१. महेंद्रसिंग धोनी हा आजचा सर्वोत्तम क्रिकेटर असेल पण त्याची पहिली पसंती फुटबॉलला होती. तो लहानपणी शाळेत गोलकीपिंगही करायचा. त्याचे कौशल्य पाहून त्याच्या प्रशिक्षकांनी त्याला क्रिकेटमध्ये यष्टिरक्षक होण्यााचा सल्ला दिला. त्यानंतर क्रिकेटमध्ये धोनीने आपल्या यष्टीरक्षणाबरोबर फलंदाजीने सर्वांना प्रभावित केले.
२. एकीकडे भारतीय संघातील अनेक स्टार खेळाडू अंडर-१९ मधून भारतीय संघात दाखल झाले आहेत. दुसरीकडे, धोनीची अंडर-१९ संघात निवड झाली नाही. मात्र याशिवाय त्याला त्याच्या टॅलेंटमुळे भारतीय संघात स्थान मिळाले.
३. एमएस धोनीने २०११ च्या विश्वचषकाच्या फायनलमध्ये फक्त खिचडी खाल्ली होती आणि भारताला विश्वविजेता बनवले होते. नुकताच माजी क्रिकेटपटू वीरेंद्र सेहवागने याबाबत खुलासा केला आहे.
४. माहीला बाइक्सची खूप आवड आहे आणि त्याच्याकडे जगातील सर्वात महागड्या ते अनोख्या बाइक्स आहेत. त्याच्या घरात बाईक शोरूम देखील आहे ज्यामध्ये सर्व वाहने ठेवली आहेत.
५. निवृत्तीनंतर धोनीने आता शेतीवरही लक्ष केंद्रित करण्यास सुरुवात केली आहे. झारखंडमध्येच त्याचे मोठे शेती फार्म आहे, ज्याला तो नियमित भेट देतो. अलीकडेच, तो एका कामगाराला त्याच्या दुचाकीवरून शेतात सोडायला जातानाचा व्हिडीओ समोर आला होता.
६. धोनीचा ट्रेड मार्क हेलिकॉप्टर शॉट आहे. हा शॉट त्याने आंतरराष्ट्रीय स्तरावर अनेकदा खेळून चेंडू सीमापार पाठवला आहे. माही अजूनही आयपीएलमध्ये हा शॉट खेळताना दिसतो.
७. महेंद्रसिंग धोनीला लष्कराने लेफ्टनंट कर्नलची मानद रँक दिली आहे. अनुभवी अष्टपैलू कपिल देव यांच्यानंतर हा सन्मान मिळवणारा माही हा दुसरा क्रिकेटर आहे. इंडियन टेरिटोरियल आर्मीने २०११ मध्ये धोनीला लेफ्टनंट कर्नल पद देऊन सन्मानित केले होते.
८. एमएस धोनीने साक्षीशी ४ जुलै २०१० रोजी डेहराडूनमध्ये लग्न केले. एंगेजमेंटच्या दुसऱ्याच दिवशी धोनीने लग्न केले होते. आज साक्षी आणि धोनी झिवा नावाच्या मुलीचे पालक आहेत.
९. एमएस धोनी २००८ आणि २००९ मध्ये आयसीसी एकदिवसीय प्लेयर ऑफ द इयर होता. त्याला २००९ मध्ये पद्मश्री आणि २०१८ मध्ये पद्मभूषण पुरस्काराने सन्मानित करण्यात आले.
१०. धोनीने आपल्या आंतरराष्ट्रीय करिअरची सुरुवात रनआऊटने केली आणि शेवटही रनआऊटने केला. डिसेंबर २००४ मध्ये बांगलादेशविरुद्धच्या शेवटच्या एकदिवसीय सामन्यात तो रनआऊट झाला होता. त्यानंतर २०१९ मध्ये एकदिवसीय विश्वचषक सामन्यात न्यूझीलंडविरुद्ध रनआऊट झाला.