नवी दिल्ली : विमानाने प्रवास करणाऱ्यांसाठी एक आनंदाची बातमी आहे. स्पाइसजेटनंतर टाटा समूहाची कंपनी, एअर इंडियाही तुम्हाला स्वस्तात प्रवास करण्याची संधी देत आहे. टाटा समूहाच्या मालकीच्या एअर इंडियाने प्रवाशांसाठी मोठी ऑफर लाँच केली आहे. एअरलाइनने त्यांच्या देशांतर्गत आणि आंतरराष्ट्रीय मार्ग नेटवर्कवर ९६ तासांची विशेष तिकिटे सुरू केली असून या ऑफरद्वारे एअर इंडिया प्रवाशांना त्यांच्या आगामी प्रवासाची आकर्षक भाड्यात योजना करण्याची संधी देत आहे.
कंपनीने देशांतर्गत आणि आंतरराष्ट्रीय मार्गावर ही ९६ तासांची ऑफर सुरू केली असून या अंतर्गत देशांतर्गत मार्गावरील एकेरी तिकीटाची किंमत इकॉनॉमी क्लाससाठी १४७० रुपये आणि बिझनेस क्लाससाठी १० हजार १३० रुपयांपासून सुरू होईल. तसेच निवडक आंतरराष्ट्रीय मार्गांची तिकिटे देखील त्याच किमतीत खरेदी करता येतील. ही ऑफर एअर इंडियाच्या वेबसाइट आणि मोबाइल ॲपद्वारे बुकिंगवर उपलब्ध असेल.
एअर इंडिया ऑफरसाठी बुकिंग कशी करावी?
दरम्यान, एअर इंडियाच्या वेबसाइट (airindia.com) आणि मोबाइल ॲपद्वारे तिकीट बुक करून या ऑफरचा लाभ घेता येईल. विशेष म्हणजे बुकिंग सेवा पूर्णपणे मोफत आहे. एअर इंडियाचे फ्लाइंग रिटर्न्स सदस्य सर्व तिकिटांवर दुप्पट लॉयल्टी बोनस पॉइंट मिळवू शकतात. एअर इंडिया वेबसाइट आणि मोबाइल ॲप व्यतिरिक्त विक्री अंतर्गत बुकिंग अधिकृत ट्रॅव्हल एजंट आणि ऑनलाइन ट्रॅव्हल एजंट (OTAs) द्वारे थेट चॅनेल बुकिंगशी संबंधित विशेष लाभांशिवाय देखील केले जाऊ शकते. या सेल अंतर्गत जागा मर्यादित असल्यामुळे प्रथम येणाऱ्यास प्राधान्य दिले जाईल.
एअर इंडियाची विशेष ऑफर
टाटा समूहाच्या या एअरलाइन्सच्या विशेष ऑफर अंतर्गत तिकिटांची विक्री काल, १७ ऑगस्टपासून सुरू झाली असून २० ऑगस्टपर्यंत इच्छूक ऑफरचा फायदा घेऊ शकतात. तर या ऑफर अंतर्गत तुमच्या प्रवासाची तारीख १ सप्टेंबर २०२३ ते ३१ ऑक्टोबर २०२३ दरम्यान असल्यास तुम्हाला या ऑफरचा लाभ मिळेल.
एअर इंडिया ऑफरचे ठळक मुद्दे
फ्लाइटचे बुकिंग १४७० रुपयांपासून सुरू होते
एअर इंडियाच्या फ्लाइट बुकिंगवर ३०% पर्यंत सूट.
इकॉनॉमी आणि बिझनेस केबिनसाठी सवलती लागू होतात.
AirIndia.com द्वारे तिकीट बुक केल्यास विशेष फायदे
ऑफरमध्ये समाविष्ट असलेल्या निवडक मार्ग आणि देशांसाठी विक्रीदरम्यान कोणतेही सुविधा शुल्क नाही.
बुकिंग कालावधी: १७ ऑगस्ट-२० ऑगस्ट २०२३
तुमच्या प्रवासाचा कालावधी १ सप्टेंबर ते ३१ ऑक्टोबर २०२३ (भारत आणि सार्क देशांसाठी उड्डाणे)
प्रवासाचा कालावधी १५ सप्टेंबर ते ३१ ऑक्टोबर २०२३ (युरोप/यूके, दक्षिण-पूर्व आशिया, आखाती देश, सौदी अरेबिया)