कोलंबो: आशिया चषक २०२३ च्या सुपर फोर फेरीच्या सामन्यात भारताने पाकिस्तानचा २२८ धावांच्या मोठ्या फरकाने पराभव केला. वनडेत धावांच्या बाबतीत भारताचा हा मोठा विजय आहे. या सामन्यात प्रथम फलंदाजी करताना भारताने ५० षटकात २ बाद ३५६ धावा केल्या होत्या. मात्र, लक्ष्याचा पाठलाग करताना पाकिस्तानचा संघ ३२ षटकांत केवळ १२८ धावा करू शकला. दुखापतीमुळे हरिस रौफ आणि नसीम शाह फलंदाजीला आले नाहीत. अशा प्रकारे पावसाने प्रभावित झालेल्या सामन्यात भारताने पाकिस्तानवर मोठा विजय नोंदवला. पाकिस्तानविरुद्धच्या या मोठ्या आणि धमाकेदार विजयाने कर्णधार रोहित शर्मा खूपच खूश दिसत होता. विशेषतः त्याने परतताना शतक झळकावणाऱ्या केएल राहुलचे कौतुक केले.
सामन्यानंतर रोहित शर्मा म्हणाला, “आम्ही सामन्यात ज्या पद्धतीने फलंदाजी केली, त्यात आमच्यासाठी अनेक सकारात्मक गोष्टी होत्या आणि त्यानंतर विराट आणि केएलची फलंदाजी होती. ही कोहलीची टिपिकल खेळी होती हे आम्हाला माहीत आहे. त्याने आपली खेळी चोखपणे मांडली. केएलसाठी खूप आनंद झाला. शेवटच्या क्षणी संघात बदल केला होता. दुखापतीतून सावरल्यानंतर पुनरागमन करणे सोपे नाही. नाणेफेकीच्या फक्त पाच मिनिटे आधी, आम्हाला केएल राहुलला सांगावे लागले की तुला खेळायचे आहे. अशा परिस्थितीत सामना खेळण्यासाठी तयार होणे आणि अशी खेळी खेळणे खरोखर आश्चर्यकारक आहे. ”
टीम इंडियाच्या गोलंदाजीवर रोहितही खूश दिसत होता. त्याने जसप्रीत बुमराह आणि कुलदीप यादवचे खूप कौतुक केले. रोहित म्हणाला, बुमराह खूप चांगल्या फॉर्ममध्ये दिसत होता. त्याने चेंडू दोन्ही बाजूंनी स्विंग केला. गेल्या ८-१५ महिन्यांत त्याने खूप मेहनत घेतली आहे. अशा दुखापतीनंतर पुनरागमन करणे किती कठीण असते हे मला माहीत आहे. बुमराह सध्या २७ वर्षांचा आहे. त्याचे पुनरागमन आणि अशी गोलंदाजी करणे हे बुमराह काय आहे हे दर्शवते.
विराट आणि राहुल यांच्या नाबाद द्विशतकी भागिदारीमुळे भारताने पाकिस्तानसमोर तगडे आव्हान ठेवले. विराटने ९४ चेंडूत ३ षटकार आणि ९ चौकारांसह नाबाद १२२ धावा केल्या. तर केएलने १०६ चेंडूत २ षटकार आणि १२ चौकारांसह नाबाद १११ धावा केल्या. तिसऱ्या विकेटसाठी या दोघांनी नाबाद २३३ धावांची भागिदारी केली. कोहली आणि राहुल यांच्या शतकांच्या जोरावर भारताने प्रथम फलंदाजी करताना ३५६ धावा केल्या होत्या.