बेदाणे तर आपण नेहमीच खातो पण काळ्या मनुका अशाच तुम्ही खाता की नाही? वास्तविक काळ्या मनुका या काळ्या द्राक्षांपासून तयार होतात आणि बेदाण्यांच्या तुलनेत अधिक फायदेशीर ठरतात. काळ्या मनुकांमुळे केवळ शरीरातील रक्ताची कमतरता कमी होत नाही तर केसांपासून तुमच्या त्वचेपर्यंत याचा फायदा मिळतो. जाणून घेऊया काळ्या मनुकांचे होणारे फायदे.
काळ्या मनुकांमध्ये खास पोषक तत्व असून यामध्ये फायबर, प्रोटीन, शुगर, सोडियम, कॅल्शियम, मॅग्नेशियम, पोटॅशियम, विटामिन आणि लोह आढळते. यामुळे ब्लड प्रेशर, हार्ट, पोट, हाडे, त्वचा आणि केस यांच्या समस्या दूर राहतात. पुण्यातील आहारतज्ज्ञ राधिका कार्ला यांनी काळ्या मनुकांबाबत अधिक माहिती दिली आहे. काळ्या मनुका एक स्वादिष्ट आणि पौष्टिक सुका मेवा असून शरीराला अधिक ऊर्जा मिळवून देण्यास याचा उपयोग होतो. औषधीय गुणांचा खजिना असणाऱ्या काळ्या मनुकांचा उपयोग जाणून घ्या.
पचनक्रिया होते मजबूत
काळ्या मनुकांमध्ये फायबर अधिक प्रमाणात असून यामुळे पचनक्रिया उत्तम होते आणि पचनक्रियेसंबंधित समस्या दूर करण्यास मदत मिळते. यामुळे बद्धकोष्ठता आणि पोटाच्या समस्या होत नाहीत. आपले पचनतंत्र बिघडले असेल तर रात्री तुम्ही काळ्या मनुका पाण्यात भिजवा आणि सकाळी उपाशीपोटी नियमित सेवन करा.
ओस्टियोपोरोसिसपासून मिळते सुटका
फायबरव्यतिरिक्त यामध्ये कॅल्शियम, बोरोन आणि मॅग्नेशियमसारखे पोषक तत्व आढळते जे हाडांचा विकास करण्यासाठी उपयुक्त ठरते. तसंच हाडांची बोन डेन्सिटी मजबूत करण्यासाठी कॅल्शियम आणि मॅग्नेशियम सहाय्य करते. त्यामुळे काळ्या मनुका खाल्ल्याने ओस्टियोपोरोसिसची समस्या कमी होण्यास मदत मिळते.
एनिमियासाठी फायदेशीर
काळ्या मनुकांमध्ये जास्त प्रमाणात लोह असून नियमित सेवन केल्याने शरीरातील रक्ताची कमतरता कमी होतो. ज्या व्यक्तींना एनिमियाची समस्या आहे, त्यांनी काळ्या मनुकांचे नियमित सेवन करण्याचा सल्ला डॉक्टर आणि आहारतज्ज्ञांकडूनही देण्यात येतो. तुम्ही तुमच्या डॉक्टरांच्या सल्ल्यानुसार याचे सेवन करावे.
उच्च रक्तदाब करते नियंत्रित
उच्च रक्तदाब नियंत्रित करण्यासाठी यातील फायबर आणि पोटॅशियमचे तत्व अधिक महत्त्वपूर्ण मानले जाते. हे दोन्ही पोषक तत्व असल्याने काळ्या मनुकांचे नियमित सेवन करावे. ज्यांना रक्तदाबाचा त्रास आहे तो कमी होण्यास फायदा होतो.
हृदयाचे आरोग्य राखते
हार्ट अटॅक येण्याचे मुख्य कारण म्हणजे Bad Cholesterol LDL आहे. बॅड कोलेस्ट्रॉल आणि फॅट्स जाळण्यासाठी फायबर आणि पॉलिफिनॉल्स तत्व महत्त्वाची भूमिका साकारतात. ही दोन्ही पोषक तत्व काळ्या मनुकांमध्ये अधिक प्रमाणात आढळतात. त्यामुळे काळ्या मनुकांचे नियमित सेवन हे हृदयाचे आरोग्य चांगले राखून हार्ट अटॅकचा धोका कमी करतात.
केसांना ठेवते निरोगी
लोह आणि विटामिन सी सारख्या पोषक तत्वांच्या कमतरतेमुळे केसगळती समस्या निर्माण होते. काळ्या मनुकांमध्ये लोह आणि विटामिन सी हे अत्यंत जास्त प्रमाणात मिळते. त्यामुळे केसगळतीची समस्या असेल तर काळ्या मनुका खाव्या. तसंच सफेद केसांची समस्या कमी करण्यासाठीही याचा फायदा होतो.
त्वचा होते अधिक चमकदार
आपल्या अँटीबॅक्टेरियल गुणांमुळे काळ्या मनुका खाल्ल्याने त्वचेच्या समस्यांपासून सुटका मिळते. त्वचा अधिक चमकदार आणि तजेलदार राहण्यास मदत मिळते. याचे नियमित सेवन केल्याने त्वचा अधिक तरूण आणि चमकदार दिसण्यास फायदा होतो.
कसे करावे सेवन
औषधीय गुणांनी युक्त असणाऱ्या काळ्या मनुका साधारण ७-८ घ्याव्या आणि रात्री १ ग्लास पाण्यात तुम्ही भिजवा. सकाळी उठून तुम्ही या काळ्या मनुका खा आणि भिजवलेले पाणीदेखील प्या. काळ्या मनुका खाल्ल्यानंतर साधारण अर्धा तास कोणताही पदार्थ तुम्ही खाऊ नका. याशिवाय तुम्ही खीर, शिरा अथवा अन्य पदार्थांमध्येही काळ्या मनुकांचा वापर करून घेऊ शकता.