इस्रायल-हमास संघर्षामध्ये होरपळलेले भारतीय पुन्हा मायदेशी परतू लागले असून, दोनशे विद्यार्थ्यांची पहिली तुकडी शुक्रवारी नवी दिल्लीत परतली. ‘सायरनचे आवाज...रस्त्यांवर फिरणारी शस्त्रास्त्रांची वाहने… रॉकेटच्या आवाजाने बसलेल्या कानठळ्या अशा अतिशय भीतीदायक वातावरणातून मायदेशी परतलो आहोत, ही खरोखरच समाधानाची गोष्ट आहे,’ अशी प्रतिक्रिया या विद्यार्थ्यांनी वृत्तसंस्थेच्या पत्रकारांना दिली.
काठमांडू : इस्राइलमधील संघर्षमय परिस्थितीतून नेपाळमधील २५४ विद्यार्थ्यांची सुटका करण्यात आली असून, हे विद्यार्थी काठमांडू येथे परतले आहेत, अशी माहिती नेपाळचे परराष्ट्रमंत्री एन. पी. सौद यांनी दिली. इस्रायलच्या बेन गुरियन आंतरराष्ट्रीय विमानतळावरून गुरुवारी निघालेले नेपाळ एअरलाइन्सचे विमान दुबईत थांबल्यानंतर शुक्रवारी सकाळी त्रिभुवन आंतरराष्ट्रीय विमानतळावर उतरले.
हैदराबाद येथे निदर्शने
हैदराबाद : इस्रायल-हमास संघर्षाच्या पार्श्वभूमीवर पॅलेस्टिनी नागरिकांच्या हक्कांच्या समर्थनार्थ तरुणांच्या एका गटाने शुक्रवारी येथे निदर्शने केली. ‘पॅलेस्टिनींच्या सार्वभौमत्वाच्या बाजूने आहोत,’ असे लिहिलेले फलक या युवकांच्या हातात होते. ‘गाझा कधीही मरणार नाही...’, ‘पॅलेस्टिनींना मुक्त करा...’ असेही या फलकांवर लिहिलेले होते. नौजवान भारत सभा आणि दिशा स्टुडंट्स या संघटनांकडून ही निदर्शने करण्यात आली.
२७ अमेरिकी ठार
वॉशिंग्टन : इस्रायलमध्ये सुरू असलेल्या हिंसाचारात २७ अमेरिकी नागरिक ठार झाले असून, १४ नागरिकांचा ठावठिकाणा लागलेला नाही. ‘हमास’ आणि इस्रायलमधील संघर्षाच्या पार्श्वभूमीवर इस्रायलमधून आपल्या नागरिकांना मायदेशी आणण्यासाठी अमेरिकेने खासगी विमानांची व्यवस्था केली आहे, अशी माहिती व्हाइट हाउसने दिली. पॅलेस्टाइनच्या ‘हमास’ या दहशतवादी संघटनेने इस्रायलमध्ये गेल्या शनिवारी हल्ले सुरू केले. त्याला इस्रायलने प्रत्युत्तर दिले असून, ‘हमास’च्या महत्त्वाच्या ठिकाणांना लक्ष्य केले आहे. आत्तापर्यंत या युद्धात इस्रायल आणि गाझा पट्टीतील सुमारे दोन हजार लोकांचा मृत्यू झाला आहे. स्थानिक प्रशासनाच्या माहितीनुसार, इस्रायलच्या २२२ सैनिकांसह सुमारे १३०० लोक, तर गाझा पट्टातील सुमारे १४०० लोक ठार झाले आहेत.
लंडनमधील ज्यू शाळा बंद
लंडन : सुरक्षेच्या कारणास्तव लंडनमधील ज्यू शाळा शुक्रवारीही बंद होत्या. इस्रायलमधील संघर्षाच्या पार्श्वभूमीवर शाळांनी हा निर्णय घेतला असून, त्याबद्दल संबंधित विद्यार्थ्यांच्या पालकांना माहिती देण्यात आली आहे. उत्तर लंडनमधील बेरनेट भागातील मोनोराह हायस्कूल, तोराह वोदास प्रायमरी स्कूल आणि अॅटेरस बेइस याकोव या शाळांनी याबाबत पालकांना पत्रे पाठवली आहेत. दरम्यान, ब्रिटनचे पंतप्रधान ऋषी सुनक यांनी देशातील ज्यु नागरिकांच्या सुरक्षेसाठी अतिरिक्त निधी जाहीर केला आहे.