मुंबई- लोकप्रिय दाक्षिणात्य अभिनेता विक्रम सध्या मणिरत्नम यांच्या 'पोन्नियिन सेल्वन २' साठी प्रेक्षकांमध्ये चर्चेत आहे. त्याच्यावर चाहते कौतुकाचा वर्षाव करत आहेत. चित्रपटालादेखील प्रेक्षकांचा चांगला प्रतिसाद लाभला मात्र आता विक्रमबद्दल एक धक्कादायक बातमी समोर येते आहे. एका चित्रपटाच्या चित्रीकरणादरम्यान विक्रमचा मोठा अपघात झाला आहे आणि या अपघातात त्याला जबरदस्त मार बसला आहे. हा मार इतका जबरदस्त होता की त्याची छातीची बरगडी तुटली आहे. सध्या विक्रम चित्रीकरणातून ब्रेक घेत आराम करत आहे. अभिनेत्याच्या मॅनेजरने एक ट्वीट करत याबद्दल माहिती दिली आहे. मात्र यामुळे विक्रमचे चाहते प्रचंड चिंतेत आहेत.
PS2 नंतर विक्रमने त्याचा आगामी चित्रपट 'थंगालन'च्या शूटिंगला सुरुवात केली. मात्र यादरम्यान त्याच्यासोबत अपघात झाला आणि त्याची बरगडी तुटली आहे. विक्रमच्या मॅनेजरने ट्विटरवर माहिती शेअर केली आणि खुलासा केला की चियान चित्रपटाच्या अ‍ॅक्शन सीक्वेन्सवर काम करत होता. यादरम्यान त्याला दुखापत झाली. त्यामुळे सध्या शूटिंग थांबवण्यात आले आहे. विक्रमचे मॅनेजर सूर्यनारायण यांनी बुधवारी ट्वीट करत लिहिलं, 'चियान (विक्रम) ला शूट दरम्यान दुखापत झाली आहे. त्याची बरगडी फ्रॅक्चर झाली आहे. यामुळे तो काही काळ 'थंगालन'चे शूटिंग करू शकणार नाही. त्याच्या तब्येतीच्या अपडेटबद्दल बोलायचे तर तो सध्या पूर्वीपेक्षा बरा आहे. मात्र डॉक्टरांनी त्याला पूर्ण विश्रांतीचा सल्ला दिला आहे.'
विक्रम नुकताच मणिरत्नम यांच्या 'पोन्नियिन सेल्वन २' मध्ये चौल राजकुमार आदिता करिकलनची भूमिका साकारताना दिसला. त्याची ही भूमिका प्रेक्षकांना प्रचंड आवडली. त्याची आणि ऐश्वर्या राय यांची जोडीही प्रेक्षकांच्या पसंतीस उतरली. आता विक्रमला अपघात झाल्याने त्याचे चाहते मात्र चिंतेत आहेत. ते त्याच्या लवकरात लवकर ठीक होण्यासाठी प्रार्थना करत आहेत.