मुंबई: भारत आणि श्रीलंका यांच्यातील पहिला एकदिवसीय सामना 10 जानेवारीला गुवाहाटीच्या मैदानावर खेळल्या जाणार आहे. रोहित शर्मा, विराट कोहली आणि केएल राहुलसारखे दिग्गज खेळाडू श्रीलंकेविरुद्धच्या वनडे मालिकेसाठी टीम इंडियामध्ये परतत आहेत. पण ऋषभ पंत वनडे मालिकेचा भाग नाही. ऋषभ पंत कार अपघातात जखमी झाल्याने वनडे मालिकेतून बाहेर पडला आहे. त्यानंतर भारतीय संघाची सर्वात मोठी चिंता ही आहे की पंतच्या अनुपस्थितीत श्रीलंकेविरुद्धच्या मालिकेत इशान किशन किंवा केएल राहुल यापैकी कोणाला विकेटकीपिंगसाठी संघात स्थान मिळेल.
केएल राहुलकडे विकेटकीपिंगचा अफाट अनुभव आहे, जो टीम इंडियासाठी उपयुक्त ठरू शकतो. बांगलादेश दौऱ्यावर त्याने भारतीय संघासाठी यष्टिरक्षणाची जबाबदारी सांभाळली होती. पहिल्या एकदिवसीय सामन्यात तो मधल्या षटकांमध्ये खेळताना दिसू शकतो. राहुल दीर्घकाळापासून खराब फॉर्मशी झुंजत आहे. अशा स्थितीत त्याला श्रीलंकेविरुद्ध लय साधायची आहे. त्याने टीम इंडियासाठी आतापर्यंत 48 एकदिवसीय सामन्यांमध्ये 1760 धावा केल्या आहेत. एकदिवसीय सामन्यांमध्ये विकेटकीपिंग करताना त्याने 26 झेल आणि 2 स्टंपिंग केले आहेत.
इशान किशन हा स्फोटक फलंदाजीत माहिर खेळाडू आहे. बांगलादेशविरुद्धच्या तिसऱ्या एकदिवसीय सामन्यात त्याने 210 धावांची तुफानी खेळी केली. त्यानंतर विश्वचषकात रोहित शर्मासोबत सलामीसाठी तो प्रबळ दावेदार मानला जात होता. त्याचे यष्टिरक्षण कौशल्यही अप्रतिम आहे. त्याने टीम इंडियासाठी आतापर्यंत 10 एकदिवसीय सामन्यांमध्ये 477 धावा केल्या आहेत. त्याने टीम इंडियासाठी विकेटकीपिंग करताना 3 झेल आणि 1 स्टंपिंग केले आहे. अशा स्थितीत अनुभव पाहता कर्णधार रोहित शर्मा केएल राहुलची यष्टिरक्षक म्हणून निवड करू शकतो.भारत आणि श्रीलंका यांच्यात आतापर्यंत 162 एकदिवसीय सामने झाले आहेत, ज्यामध्ये टीम इंडियाने 93 एकदिवसीय सामने जिंकले आहेत. त्याचबरोबर श्रीलंकेचा संघ केवळ 57 सामने जिंकू शकला आहे. 11 सामने अनिर्णित राहिले. त्याचबरोबर गेल्या 37 वर्षांपासून श्रीलंकेचा संघ भारतात वनडे मालिका जिंकू शकलेला नाही.