मुंबई : टीना दत्ता व शालीन भानोत ही जोडी ‘बिग बॉस १६’च्या घरामध्ये कायमच चर्चेत राहिली आहे. मध्यंतरी टीना घराबाहेर पडल्यानंतर तिला पुन्हा हा खेळ खेळण्याची संधी देण्यात आली. जेव्हा ती या घरामध्ये पुन्हा परतली तेव्हा तिचा एक वेगळाच अवतार पाहायला मिळाला. शालीनप्रती तिचा असणारा राग दिसला. आता पुन्हा हे दोघं एकत्र आले आहेत.नववर्षाच्या निमित्ताने ‘बिग बॉस’च्या इतिहासामध्ये पहिल्यांदाच घरामध्ये लाइव्ह कॉन्सर्टचं आयोजन करण्यात आलं होतं. यावेळी एमसी स्टॅन, रॅपर इक्काने आपल्या बँडसह या लाइव्ह कॉन्सर्टमध्ये परफॉर्मन्स दिला. या कार्यक्रमामध्ये टीना व शालीनने सगळ्यांचं लक्ष वेधून घेतलं. दोघंही या कार्यक्रमात एकमेकांच्या खूप जवळ आले.
दोघं अधिक इंटिमेट होऊ लागले. एकमेकांना मिठी मारत टीना व शालीन डान्स करत होते. दोघांमध्ये इतकी जवळीक वाढली की त्यांनी माइकही काढला. दोघांच्या या वागणूकीवरुन सलमान भडकला आहे. या आठवड्याच्या विकेण्ड का वारमध्ये टीनाला सलमान म्हणतो, “टीना ‘बिग बॉस’च्या गेम व्यतिरिक्त तू कोणता गेम खेळत आहेस? कोणाबरोबर गेम खेळत आहेस?”“कधी हा कधी नाही. एकदा झालं दोनदा झालं तिनदा झालं पुढे हा आहे की नाही. रोमँटिक अँगल केला की घरामध्ये टिकून राहणार असं वाटतं का? भांडण झालं तरी तू चिटकून चिटकून डान्स करते. हे काय आहे?” सलमान टीना व शालीनला ‘विकेण्ड का वार’मध्ये चांगलंच सुनावणार असल्याचं चित्र पाहायला मिळत आहे.