नवी दिल्ली : काही दिवसांपूर्वीच पंतप्रधान नरेंद्र मोदी यांच्याविषयी वादग्रस्त विधान करणारे काँग्रेसचे राष्ट्रीय प्रवक्ते पवन खेरा यांना अटक करण्यात आली होती. आता पश्चिम बंगालमध्ये काँग्रेसचे राज्य प्रवक्ते कौस्तुभ बागची यांना अटक करण्यात आली.पश्चिम बंगालच्या मुख्यमंत्री ममता बॅनर्जी यांच्याबद्दल कथित वक्तव्य केल्याप्रकरणी पश्चिम बंगाल काँग्रेसचे प्रवक्ते कौस्तुभ बागची यांना शनिवारी सकाळी त्यांच्या निवासस्थानातून अटक करण्यात आली. शहरातील बुर्तोला पोलिस ठाण्याच्या एका मोठ्या पथकाने पश्चिम बंगालच्या उत्तर २४ परगणा जिल्ह्यातील बराकपूर येथील बागची यांच्या निवासस्थानी पहाटे साडेतीनच्या सुमारास छापा टाकून त्यांना अटक केली.
बागची यांनी मुख्यमंत्र्यांविरोधात केलेल्या कथित वक्तव्याबद्दल शुक्रवारी बर्तोला पोलिस ठाण्यात तक्रार दाखल करण्यात आली होती. कौस्तुभ बागची याला त्याच्या बॅरकपूर येथील निवासस्थानातून अटक करण्यात आली आहे.अटकेनंतर बागची यांना बर्तोला पोलिस ठाण्यात आणण्यात आले. पक्षाच्या कार्यकर्त्यांनी पोलिस ठाण्याबाहेर निदर्शने केली. बागची यांच्यावर भादंविच्या 120 (बी) (गुन्हेगारी कट रचणे), 504 (शांतता भंग करण्याच्या हेतूने हेतुपुरस्सर अपमान करणे), 506 (गुन्हेगारी धमकी) आणि इतर कलमांखाली गुन्हा दाखल करण्यात आला आहे.