नवी दिल्ली : MDH कंपनीचे संस्थापक महाशय धरमपाल गुलाटी यांना भारतातील मसाल्यांचा राजा म्हणून ओळखले जाते. धरमपाल गुलाटी यांचा जन्म २७ मार्च १९२३ रोजी पाकिस्तानातील सियालकोट येथे झाला आणि देशाच्या फाळणीच्या वेळी कुटुंब भारतात स्थलांतरित झाले. दिल्लीत आल्यानंतर त्यांना कोणताही व्यवसाय मिळाला नाही म्हणून त्यांनी टांगा चालवण्यास सुरुवात केली. त्यानंतर अजमल खान रोडवर किऑस्क बनवून डाळी, तेल आणि मसाल्यांचे दुकान उघडले.
पाकिस्तानातून भारतात यशाचे शिखर सर केले
देशभरात MDH मसाल्यांच्या मागणीचे प्रमुख कारण म्हणजे त्यांची गुणवत्ता आणि चव आहे. गेल्या काही वर्षांत मसाल्यांचे अनेक ब्रँड उदयास आले आणि त्यांनी बाजारात आपले स्थान निर्माण केले. पण MDH अजूनही नेत्यासारखा उंच उभा आहे. गुलाटी यांनी एका छोट्या मसाल्यांच्या दुकानापासून कोट्यवधी रुपयांची कंपनी उभी केली. भारत-पाकिस्तान फाळणीच्या वेळी लाखो निर्वासितांप्रमाणे धरमपाल गुलाटी आपल्या कुटुंबासह पाकिस्तानातून भारतात पोहोचले. पाचवीपर्यंत शिकलेले टांगेवाले धरमपाल गुलाटी यांनी आपल्या मेहनतीने कोट्यवधी रुपयांची मसाले कंपनी उभी केली.
टांगा चालवून भरलं पोट
१९४७ मध्ये भारत-पाकिस्तान फाळणीदरम्यान गुलाटीही इतरांप्रमाणे दिल्लीला आले. जेव्हा ते पाकिस्तानातून भारतात आले तेव्हा त्यांच्याकडे फक्त १५०० रुपये होते पण कधीतरी मोठं करण्याची त्यांची जिद्द होती, असे म्हटले जाते. दिल्लीतूनच धरमपाल यांचा संघर्ष आणि यशाचा प्रवास सुरू झाला. तथापि, मसाल्यांचा व्यवसाय करण्यापूर्वी ते दिल्लीत टांगा चालवून आपल्या कुटुंबाचे पोट भरायचे. इथून काही पैसे कमावल्यावर त्यांनी दिल्लीच्या करोलबाग येथे मसाल्यांचे छोटेसे दुकान उघडले आणि एक व्यापारी म्हणून आपला ठसा उमटवायला सुरुवात केली.
बनले भारताचे मसाला किंग
पाहतापाहता काही वर्षांतच धरमपाल गुलाटी मसाला किंग म्हणून देशात प्रसिद्ध झाले. त्यांच्या मसाल्याच्या व्यवसायाला इतके यश मिळाले की आज देशभरात त्यांचे अनेक मसाल्यांचे कारखाने उघडले असून MDH मसाला फक्त भारतातच नाही तर परदेशातही निर्यात केला जातो.
पाकिस्तान जन्मभूमी तर भारत कार्यभूमी
धरमपाल गुलाटी यांचा जन्म २७ मार्च १९२३ रोजी पाकिस्तानातील सियालकोट येथे झाला. अभ्यासात रस नसल्यामुळे त्यांनी फक्त पाचवीपर्यंतच शिक्षण घेतले आणि वयाच्या १४व्या वर्षी त्यांनी वडिलांसोबत व्यवसाय करण्यास सुरुवात केली. साबण, कापड आणि तांदूळ यांचा व्यवसाय करत असताना त्यांचे वडील चुन्नीलाल गुलाटी यांनी 'महाशियां दी हात'ची (MDH) स्थापना केली. त्यावेळी ते देगी मिर्च वाले म्हणून ओळखले जायचे.
९४व्या वर्षी सर्वाधिक पगार घेणारे सीईओ
धरमपाल गुलाटी २०७ मध्ये भारतातील सर्वाधिक पगार घेणारे FMCG कंपनीचे CEO बनले. गुलाटी आपल्या पगारातील ९०% रक्कम दान करायचे, असे सांगण्यात आले. एमडीएचला ब्रँड बनवताना ते स्वतः त्या ब्रँडचा प्रमुख चेहरा बनले. त्यांच्या कंपनीची एकूण संपत्ती पाच हजार कोटींच्या आसपास असल्याचे सांगितले जात असून धरमपाल गुलाटी स्वतः त्यांच्या मसाल्याच्या पदार्थांची जाहिरात करायचे. टीव्हीवरील MDH मसाल्यांच्या जाहिरातींमध्ये तुम्ही त्यांना अनेकदा पाहिलं असेल. देशभरात अनेकजण त्यांना 'MDH अंकल' म्हणून ओळखतात.