आगामी लोकसभा निवडणुकांची पूर्व तयारी राज्यातील सर्व जिल्हा निवडणूक अधिकाऱ्यांमार्फत सुरू आहे. तसेच राज्यातील सर्व विधानसभा मतदारसंघातील मतदारयाद्यांचे विशेष संक्षिप्त पुनरीक्षण एक जानेवारी २०२४ या अर्हता दिनांकावर करण्याचा कार्यक्रम सुरू आहे. आगामी लोकसभा निवडणुका-२०२४ मध्ये होणार असून त्या दृष्टीने राज्यातील मतदारयाद्या अद्ययावत करण्यासाठी हा कार्यक्रम महत्त्वाचा आहे. या पार्श्वभूमीवर केंद्रीय निवडणूक आयोगाचे उपायुक्त हिर्देशकुमार यांच्या नेतृत्वाखालील आयोगाच्या वरिष्ठ अधिकाऱ्यांच्या पथकाने राज्याचा दौरा केला.
या पथकामध्ये भारत निवडणूक आयोगाचे वरिष्ठ प्रधान सचिव एन. एन. बुटोलिया, सचिव सौम्यजित घोष, सचिव सुमनकुमार दास यांचा समावेश होता. या पथकाने सर्व जिल्हाधिकारी व जिल्हा निवडणूक अधिकारी यांच्या समवेत सह्याद्री अतिथीगृहात नुकतीच बैठक घेऊन मार्गदर्शन केले. या बैठकीत सर्व जिल्हाधिकारी व जिल्हा निवडणूक अधिकाऱ्यांनी जिल्ह्यांचे सादरीकरण आयोगासमोर केले. राज्याचे मुख्य निवडणूक अधिकारी श्रीकांत देशपांडे, सहमुख्य निवडणूक अधिकारी म. रा. पारकर तसेच मुख्य निवडणूक कार्यालयातील वरिष्ठ अधिकारी उपस्थित होते.
राज्यात सर्व जिल्ह्यांमध्ये १८-१९ वर्षे वयोगटातील मतदारनोंदणींची टक्केवारी वाढविण्यासाठी जिल्हा निवडणूक अधिकाऱ्यांनी प्रयत्न करावेत, शाळा, महाविद्यालये, विविध आस्थापनांमध्ये विशेष मोहीम राबविणे, मतदार साक्षरता मंडळ, स्वयंसेवी संस्था, महाविद्यालयातील स्वयंसेवकांच्या मदतीने या वयोगटातील अधिकाधिक तरुणांचे नाव मतदारयादीत समाविष्ट करणे, मतदारनोंदणी अधिकाऱ्यांकडून महाविद्यालयनिहाय मतदारनोंदणीचा आढावा नियमित घेणे आदी उपयायोजना सुचविल्या आहेत.
राज्यातील महिला तसेच दिव्यांग व्यक्तींच्या मतदारनोंदणीची टक्केवारी वाढविण्यासाठी विशेष मोहीम राबवत ग्रामसभांमध्ये मतदारयाद्यांचे वाचन करून टक्केवारी वाढविण्याचे निर्देश दिले. मतदारयादींमधील दुबार तसेच मृत व्यक्तींची नावे वगळण्याबाबत करावयाच्या कार्यवाहीचे मार्गदर्शन आयोगाने केले. मतदान केंद्रांमध्ये सर्व किमान आवश्यक सुविधा उपलब्ध करून द्याव्यात, असे निर्देश यावेळी देण्यात आले.
लोकसभा निवडणुका-२०१९ मधील मतदानाची राष्ट्रीय सरासरी तसेच राज्य सरासरीपेक्षा कमी सरासरी असलेल्या विधानसभा मतदारसंघाकडे विशेष लक्ष देऊन तेथील मतदानाची आकडेवारी वाढविण्याच्या दृष्टीनेही आयोगाने उपाययोजना सुचविल्या आहेत. मतदारयाद्या, अद्ययावत करण्याच्या कामात उत्कृष्ट कामगिरी करणाऱ्या अधिकाऱ्यांना राष्ट्रीय मतदानाच्या दिवशी सन्मानित करण्यात येईल, असेही मुख्य निवडणूक अधिकारी देशपांडे यांनी सांगितले.