दक्षिण चित्रपटसृष्टीचा सुपरस्टार नागार्जुन आणि त्याच्या संपूर्ण कुटुंबाने मालदीवचा दौरा रद्द केला आहे. मालदीव आणि भारत यांच्यात प्रचंड तणाव असताना त्यांनी हे पाऊल उचलले आहे. पंतप्रधान नरेंद्र मोदी यांच्या लक्षद्वीप दौऱ्यापासून दोन्ही देशांमध्ये सध्या तणावाचे वातावरण आहे. पंतप्रधान मोदींनी X वर लक्षद्वीप दौऱ्याचे काही फोटो शेअर केले होते आणि देशवासियांना या केंद्रशासित प्रदेशाला एकदातरी भेट देण्याचे आवाहन केले होते. यानंतर मालदीवच्या काही नेत्यांनी या फोटोंवर आक्षेपार्ह कमेंट केल्या, यावरुनच हा वाद सुरु झाला असून तो चिघळला आहे. अनेक देशवासीय आणि चित्रपट क्षेत्रातील व्यक्तींनीही सोशल मीडियावर मालदीववर बहिष्कार टाकण्यास सुरुवात केली. अशातच आतानागार्जुननेही मालदीवचा दौरा रद्द केला आहे.
नागार्जुन यांनी मालदीवचा दौरा रद्द केला
नागार्जुन म्हणाले, 'मला १७जानेवारीला मालदीवला सुट्टीवर जायचे होते, मी माझ्या कुटुंबियांना जास्त वेळ देऊ शकत नाही. मी कोणताही ब्रेक न घेता ७५ दिवस 'बिग बॉस' आणि 'ना सामी रंगा'चे शूटिंग सुरू ठेवले. त्यामुळे मी तिथे सहलीला जाण्याचा निर्णय घेतला होता.
नागार्जुन पुढील आठवड्यात लक्षद्वीपला भेट देणार
नागार्जुनही आता 'बायकॉट मालदीव' मोहिमेचा एक भाग बनले आहेत. त्यांनी संगीतकार एमएम कीरावानी यांच्यासोबत व्हिडिओमध्ये मालदीवबद्दल चर्चा केली. ते पुढे म्हणाले, 'मी माझी मालदीवची तिकिटे रद्द केली आहेत आणि आता पुढच्या आठवड्यात लक्षद्वीपला जाण्याचा विचार करत आहे.'
भारत-मालदीव तणावाच्या पार्श्वभूमीवर नागार्जुनने मालदीवचा दौरा रद्द केला आहे. पीएम मोदींवर केलेल्या कमेंटची किंमत मालदीवला चुकवावी लागेल, असे नागार्जुन म्हणाले.नागार्जुन यांनी मालदीव ट्रिपची तिकिटे रद्द करून आता लक्षद्वीपला जाणार असल्याचे सांगितले.
'पंतप्रधानांवर केलेल्या टिप्पणीची किंमत मोजावी लागेल'
नागार्जुन यांनी सांगितले की, ते याआधी सुट्ट्यांसाठी मालदीवला जाणार होते, परंतु यापूर्वी असा कोणताही वाद झाला नव्हता. आता परिस्थिती बिकट झाल्यावर नागार्जुनने हे पाऊल उचलले. नागार्जुन म्हणाले, 'त्यांच्या मंत्र्यांनी आमचे पंतप्रधान नरेंद्र मोदी यांच्या विरोधात आक्षेपार्ह टिप्पणी केली, आणि त्यांना त्याची किंमत चुकवावी लागेल. पंतप्रधान मोदी हे १.५अब्ज लोकांचे नेते आहेत आणि जगभरात त्यांचा आदर केला जातो.
या चित्रपटात नागार्जुन दिसणार
नागार्जुन यांचा 'ना सामी रंगा' हा सिनेमा लवकरच प्रदर्शित होईल. याचे चित्रिकरण नुकतेच संपले आहे. हा एका मल्याळम चित्रपटाचा रिमेक आहे. यापूर्वी नागार्जुन 'द घोस्ट'मध्ये दिसले होते.