दुसऱ्या देशात स्वस्त तर मग भारतात महाग का आहेत आयफोन?, सरकार जबाबदार?

 

Apple ने आपली iPhone 14 सीरीज लाँच केली आहे असून या सीरीज मधील फोनच्या किंमती सुद्धा आता समोर आल्या आहेत. अन्य देशाच्या तुलनेत भारतात नेहमीप्रमाणे आयफोनच्या किंमती जास्त आहेत, या किंमतीला कोण जबाबदार आहे, जाणून घ्या डिटेल्स.

नवी दिल्लीः टेक कंपनी Apple ने आफली नवीन iPhone 14 सीरीज लाँच केली आहे. भारतात याची किंमत समोर आली आहे. नेहमी प्रमाणे अमेरिका आणि भारतात आयफोन मॉडल्सच्या तुलनेत खूप मोठे अंतर आहे. अमेरिकेत जे मॉडल जवळपास ६४ हजार रुपयांना मिळत आहे. ते मॉडल भारतात खरेदी करण्यासाठी ग्राहकांना तब्बल ८० हजार रुपये मोजावे लागत आहेत. भारत आणि अमेरिकेत आयफोनच्या किंमतीत मोठे अंतर आहे.

आयफोन १४ सीरीजची सुरुवातीची किंमत अमेरिकेत ७९९ डॉलर (जवळपास ६३ हजार ७०० रुपये) आहे. तर भारतात याच फोनची किंमत ७९ हजार ९०० रुपये ठेवली गेली आहे. याच प्रमाणे आयफोन १४ प्लसची किंमत अमेरिकेत ८९९ डॉलर (जवळपास ७१ हजार ६०० रुपये) तर भारतात या फोनची किंमत ८९ हजार ९०० रुपये ठेवली आहे. प्रो मॉडल्समध्ये अमेरिकेत आयफोन १४ प्रोची किंमत ९९९ डॉलर म्हणजेच जवळपास ७९ हजार ५५५ रुपये पासून सुरू होते. तर भारतातील ग्राहकांना या फोनसाठी १ लाख २९ हजार ९०० रुपये मोजावे लागतील. आयफोन १४ प्रो मॅक्सची सुरुवातीची किंमत अमेरिकेत १०९९ डॉलर म्हणजेच जवळपास ८७ हजार ५३० रुपये आहे तर भारतात १ लाख ३९ हजार ९०० रुपये आहे. अमेरिका आणि भारत या दोन देशात आयफोन मॉडल्सच्या किंमतीत ४० हजार रुपयांपर्यंत फरक आहे.

भारतात महाग का विकले जातात आयफोन मॉडल्स
दुसऱ्या देशांच्या तुलनेत भारतात आयफोन मॉडल्सच्या किंमती जवळपास ४० टक्के जास्त ठेवली आहे. एक्सपर्ट्सच्या म्हणण्यानुसार, देशात आयफोन आयात करण्यासाठी लावली गेलेली इंपोर्ट ड्युटी, १८ टक्के जीएसटी, दुसरी फी आणि कंपनीचा प्रॉफिट मार्जिन यामुळे फोनच्या किंमतीत वाढ होते. म्हणजेच सरकारकडून लावल्या गेलेल्या टॅक्स आणि ड्युटीमुळे फोनच्या किंमती वाढतात.