मुंबई: मराठी आणि हिंदी चित्रपटात मोजकं काम व चोख अभिनय करणारी अभिनेत्री म्हणून सुचित्रा बांदेकर यांची ओळख आहे. 'बाईपण भारी देवा'मधील त्यांच्या कामाचं कौतुक होतंय. त्या असलेले चित्रपट सुपरहिट होतात, असं समीकरण तयार झालं आहे. त्यामुळे त्यांना 'लकीचार्म' असं म्हणतात. चित्रपटांमधील भूमिकांची निवड, मालिका निर्मितीचा अनुभव अशा विविध विषयांवर त्यांच्याशी झालेल्या दिलखुलास गप्पा…
ध्यानीमनी नसताना 'झिम्मा' केला
मी भारताबाहेर प्रवास करत होते. तेव्हा अचानक माझी जुनी मैत्रीण क्षिती जोगचा फोन आला आणि तिनं 'झिम्मा'साठी विचारलं. क्षिती चित्रपटाची निर्मिती करत आहे म्हटल्यावर मी लगेचच होकार दिला आणि ध्यानीमनी नसताना 'महिला' व 'प्रवास' या दोन धाग्यांना जोडणारा 'झिम्मा' आयुष्यात आला.
एकमेव साम्य
मुख्य भूमिकांमध्ये महिला हे एकमेव साम्य 'झिम्मा' आणि 'बाईपण भारी देवा' या दोन चित्रपटांमध्ये आहे. आशय, विषय, मांडणी या सर्व बाबतीत दोन्ही चित्रपट निराळे आहेत. 'बाईपण…'चे दिग्दर्शक केदार शिंदेला पल्लवी ही व्यक्तिरेखा साकारण्यासाठी माझी निवड योग्य आहे, याबाबत सुरुवातीपासून खात्री होती. यानिमित्तानं निराळ्या ढंगाची भूमिका साकारता आली, याचा विशेष आनंद आहे.
चौकटीबाहेरची 'ती'
'बाईपण भारी देवा'मधील पल्लवी या भूमिकेचं कौतुक करणारे अनेक फोन आणि मेसेजेस आले. मित्र-मैत्रिणींनी आंतरमहाविद्यालयीन स्पर्धांची आठवण झाली, असं सांगितलं. कारण कॉलेजमध्ये असताना निराळ्या धाटणीच्या भूमिका करणं, ही माझी खासियत होती. पल्लवीचं पडद्यावरील आधुनिक रूप- हेअरकलर, भडक रंगाचे कपडे, लायनर्सच्या हटके शेड्स हे भूमिकेसाठी गरजेचं होतं. सुरुवातीला मेकअपच्याबाबतीत मी अगदी निरुत्साही होते, पण आता पडद्यावर स्वतःला पाहताना खूप छान वाटतंय. पल्लवी ही व्यक्तिरेखा मुळात छान लिहिली गेलीय. व्यावसायिक जीवनात यशस्वी असलेल्या स्त्रीची वैयक्तिक आयुष्यातील ठाम निर्णय घेतानाची तगमग मांडणं आव्हानात्मक होतं.
तरुणांची ताकद
सोहम फक्त माझा मुलगा आहे म्हणून नाही सांगत, पण खरंच तो हुशार आहे. सोहम चांगलं वाचतो आणि जगभरातील दर्जेदार कलाकृती आवर्जून पाहतो. त्याची मतं तो उत्तम प्रकारे मांडू शकतो. आमच्या निर्मिती संस्थेसाठी तरुणांचं नेतृत्व करणारा त्याचा दृष्टिकोन अतिशय महत्त्वाचा ठरतो. तंत्रज्ञानाशी जुळवून घेण्याच्या बाबतीत मला सोहमची फार मदत होते. अगदी मालिकेचे संवादसुद्धा फोनवर वाचणं मला जड जातं. माझं म्हणणं असतं, एक कॉपी काढून मला कागदावर वाचायला द्या.
भावोजींकडून कौतुकाची थाप
आदेश खरं तर फार व्यक्त होत नाही. त्याच्याकडून कामाचं कौतुक क्वचित होतं. 'बाईपण भारी देवा' हा चित्रपट बघताना मध्यंतरातच त्यानं मला जवळ घेऊन 'अप्रतिम काम केलं आहेस आणि खूप सुंदर दिसली आहेस' अशी प्रतिक्रिया दिली. हे माझ्यासाठी अनपेक्षित होतं. आदेशकडून मिळालेली ही शाबासकी कायम आठवणीत राहील.
मोजकं काम आणि चोख अभिनय
मी देवाची लाडकी आहे. स्वामींचं माझ्यावर प्रेम आहे. म्हणून जे-जे चांगलं असतं, तेच माझ्या वाट्याला येतं. 'फुल थ्री धम्माल', 'मी शिवाजी राजे भोसले बोलतोय', 'सिंघम', 'सिम्बा', 'रणांगण', 'झिम्मा', 'बाईपण भारी देवा' असे अगदी मोजके सिनेमे मी केले आहेत आणि हे सगळे सुपरहिट आहेत. माझा सुपरहिटचा रेकॉर्ड ९९ टक्के आहे, त्यामुळे मला सिनेसृष्टीत 'लकीचार्म' असं म्हणतात. आपण प्रामाणिकपणे काम करत राहायचं, प्रत्येक कलाकृती तिचं नशीब घेऊन जन्माला येते, असं मला वाटतं.
निर्मितीची गणित जुळवताना…
'सोहम प्रोडक्शन्स' ही आमची निर्मिती संस्था गेली ८-१० वर्षं कार्यरत आहे. 'लक्ष्य' या पहिल्या मालिकेला भरूनभरून प्रतिसाद मिळाला. मध्यंतरीच्या काळात आम्ही मालिका करत होतो, पण कोणत्याच मालिकेला उल्लेखनीय प्रतिसाद मिळाला नाही. सध्या सुरू असलेली 'ठरलं तर मग' ही मालिका टीआरपीच्या शर्यतीत प्रथम क्रमांकावर आहे. प्रत्येक कलाकृती सर्जनशीलतेनं मांडण्याचा आम्ही पूर्ण प्रयत्न करतो. प्रेक्षकांची दाद मिळाली की जबाबदारी आणखी वाढल्याची जाणीव होते.
व्यक्तिरेखा ताकदीची हवी
सुदैवानं मला कुटुंबियांकडून कामाच्या निवडीबाबत पूर्ण स्वातंत्र्य आहे. कोणतं काम करायचं? याबाबतचे निर्णय पूर्णपणे माझे असतात आणि या निवडीबाबत मी थोडी हट्टी आहे! एक तर मी मैत्रीखातर काम करते किंवा भूमिकेची ताकद बघून काम स्वीकारते. नाटकात काम करण्याचा सध्या तरी मनसुबा नाहीय. 'मालिका' या माध्यमानं मला ओळख दिली. मालिकाविश्वात पुनरागमन करायला निश्चितच आवडेल, पण भूमिका चांगली हवी असा माझा आग्रह असेल. दररोज सकाळी साडेआठची शिफ्ट करण्याची ऊर्जा देणारी भूमिका असेल तर नक्कीच विचार करेन. मी साकारलेली व्यक्तिरेखा ही इतरांसाठी 'ड्रीम रोल' ठरावी, म्हणून मी सदैव प्रयत्नशील असते.